23 saylı TSEK-da qanunsuzluq

Yaşar Allahverdiyev sələfinə şükür oxutdurur

Bölgələrdə fəaliyyət göstərən bəzi Tibbi-Sosial Ekspert Komissiyalarının yarıtmaz fəaliyyəti yerli sakinləri və təbii ki, ilk növbədə bu qurumların xidmətlərinə ehtiyacları olan əlil və xəstə vətəndaşları son dərəcə narahat edir. Bu vətəndaşların kütləvi informasiya vasitələrinə ünvanladıqları çoxsaylı şikayət ərizələrində TSEK rəhbərlərinin törətdikləri müxtəlif özbaşınalıqlar və ciddi qanun pozuntularına, yol verilən çeşidli korrupsiya hallarına dair ətraflı məlumatlar təqdim olunur. Redaksiyamıza daxil olan şikayət məktublarında, fəaliyyətində daha çox neqativ halların müşahidə olunduğu bu tip müəssisələrdən biri kimi də məhz 23 saylı Mingəçevir-Yevlax TSEK təqdim olunur. Qeyd edək ki, mətbuat səhifələrində 23 saylı TSEK-in sədri Yaşar Allahverdiyevin qanunsuz əməllərindən bəhs edən tənqidi materiallar mütəmadi olaraq dərc olunur. Buna baxmayaraq nə Əmək və Əhalinin Sosial Müdafiəsi Nazirliyi, nə də digər aidiyyalı qurumlar tərəfindən onun əməllərinə son qoyulması istiqamətində hələ də heç bir tədbir görülməmişdir.

Qaynarxett.info-ya daxil olan məlumatda bildirilir ki, bir neçə gün əvvəl Yaşar Allahverdiyev elə iş yerindəcə onun və tabeliyində olan əməkdaşların süründürməçiliyindən bezar olmuş xəstələrin qəzəbinə tuş gəlib. Şikayyətçilər TSEK sədrindən hansı səbəbdən komisiyadan keçirilərək əlillik dərəcələrini ala bilmədiklərinin səbəbin soruşublar. Mənəbələr bildirir ki, bu hadisədən bir qədər əvvəl Yaşar Allahverdiyev xəstələrdən təxminən 15 nəfərdən artıq şəxsin komisiyadan keçirilərək, onlara əlillik dərəcəsi verəcəyini bildirmişdi. Bu dəfə isə TSEK sədri xəstələri son ümidlərindən də məhrum edərək onlara təxminən belə bir cavab vermişdi: “Mən nə edə bilərəm ki, nazirlikdə məndən hər bir xəstəlik sənədi üçün 1000 manat tələb edirlər?..”

Qeyd etmək lazımdır ki, 23 saylı Mingəçevir-Yevlax Tibbi Sosial Ekspert Komissiyasının sədri Yaşar Allahverdiyev bu vəzifəyə cəmi 1 ilə yaxındır ki, təyin olunub. Bundan əvvəl isə Y.Allahverdiyev Mingəçevir Təcili və Təxirəsalınmaz Tibbi Yardım Stansiyasının baş həkimi vəzifəsində işləyib. Lakin TSEK-də yeni fəaliyyət göstərməsinə rəğmən Yaşar Allahverdiyev artıq bir çox vətəndaşların narazılıqlarına səbəb ola bilib. Bu xüsusda redaksiyamıza daxil olan məlumatlarda bildirilir ki, 23 saylı TSEK-də əlillik dərəcələrinin müəyyənləşdirilməsi işində çox ciddi nöqsanlar var və elə bunun nəticəsidir ki, saxta əlillik dərəcələrinin sayı durmadan artır. Qeyd edək ki, son vaxtlar bir çox mətbuat səhifələrində 23 saylı TSEK-in keçmiş sədrinin də eyni tərkibli qanunsuz əməllərindən bəhs edən tənqidi materiallar dərc olununurdu. Belə materiallardan əksəriyyətində bildirilirdi ki, Mingəçevir-Yevlax 23 saylı Tibbi Sosial Ekspert Komissiyası tərəfindən vətəndaşlara əsassız olaraq əlillik dərəcələrinin verilməsinə dair konkret faktlar mövcuddur. Belə görünür ki, Yaşar Allahverdiyev bu istiqamətdə TSEK-in fəaliyyətində heç bir dəyişiklik etmək niyyətində deyil. Ümumiyyətlə isə bu tibb müəssisəsinin yarıtmaz fəaliyyəti mütəmadi olaraq rayon sakinlərinin narazılıqlarını doğurmaqdadır. Aldığımız məlumatlarda da qeyd olunur ki, 23 saylı TSEK-in əməkdaşları bir çox hallarda əmək qabiliyyətini itirən şəxslər barəsində əlillik dərəcəsinin təyin edilməsində süründürməçiliyə yol verirlər. Hər dəfə bir bəhanə ilə əlillik dərəcəsi almaq istəyən şəxslərin tələbləri yerinə yetirilmir. Bunun müqabillində isə vətəndaşlardan əlillik dərəcələrinin verilməsi üçün külli miqdarda rüşvət istənildiyi bildirilir. Qeyd olunur ki, I qrup əlillik dərəcəsi almaq üçün minimum 1000 manat, II qrup üçün 600-700 manat, III qrup üçün isə 400 manat rüşvət tələb olunur. Həmçinin əlavə edilir ki, pulu olmayan və fiziki qüsurlu şəxslərin əlillik dərəcəsinin verilməsi prosesi həyata keçirilmir. Ümumiyyətlə son vaxtlar bölgələrdə fəaliyyət göstərən Tibbi-Sosial Ekspert Komissiyalarının yarıtmaz fəaliyyəti ilə bağlı vətəndaşların aidiyyatı olan qurumlara ünvanladıqları şikayət ərizələrində bir say artımı müşahidə olunmaqdadır. Bunu nəzərə alaraq ehtimal etmək olar ki, Əmək və Əhalinin Sosial Müdafiəsi Nazirliyi tərəfindən bu sahədə həyata keçiriləcək islahatlar, strukturun məhz Yaşar Allahverdiyev kimi kadrlardan “təmizlənməsini” də nəzərdə tutur. Əks halda isə islahatlar paketi heç bir müsbət nəticəyə səbəb ola bilməyəcək.