Akif Çovdarov vəkillərindən imtina etdi - Səbəb

Musavat.com xəbər verir ki, bunu sayta açıqlamasında vəkil Kamandar Nəsibov deyib.

Vəkil bildirib ki, A.Çovdarov məhkəməyə etiraz olaraq onlardan imtina edib.

"Akif Çovdarov məhkəmədə dedi ki, əgər vəkillərim mənim səhhətimlə bağlı bir iş görə bilmirlərsə, onların verdikləri heç bir vəsatət təmin olunmursa, mən onların xidmətindən imtina edirəm. Çovdarov dedi ki, məhkəmə sifariş yerinə yetirir və ona qarşı qərəzlidir. Bu səbəbdən də vəkillərindən imtina ilə bağlı məhkəməyə yazılı müraciət verib"- vəkil açıqlamasında deyib.

K.Nəsibov onu da bildirib ki, Çovdarov məhkəməyə oksigen balonu ilə gətirilibmiş.

"Çovdarov nəfəs ala bilmədiyini deyir. Onu zorla məhkəməyə gətiriblər. Buna görə də o, etiraz edir. Biz vəsatət verdik ki, onun səhhəti ilə bağlı ekspertiza təyin olunsun. Digər vəsatətimiz məhkəmə heyətinə etirazla bağlı idi. Ancaq baxılmamış saxlanıldı"- deyə vəkil əlavə edib.

Qeyd edək ki, Çovdarovun vəkillərdən imtina ilə bağlı müraciəti baxılmamış saxlanılıb.

Məhkəmə prosesi noyabrın 15-nə təxirə salınıb.