Ermənilər Qarabağla bağlı geri addım atdılar
Ermənistan parlamenti də müstəqilliklə bağlı qanun layihəsini mayın 10-na nəzərdə tutulan iclasın gündəliyinə salmayıb.
«Biz Qarabağın müstəqilliyini dəstəkləmirik». ANS PRESS-in məlumatına görə, bu barədə Ermənistan hökuməti məlumat yayıb. Ermənistanın baş nazirinin sözçüsü Qoar Poqosyan öz «Facebook» səhifəsində «Ermənistanın Dağlıq Qarabağ Respublikasının müstəqilliyinin tanınması barədə qanun layihəsini» Ermənistan hökumətinin bəyəndiyi barədə məlumatı təkzib edib.
Hökumətin yekun rəyində qeyd olunur ki, icra orqanı qanun layihəsinin qəbulunu Ermənistanla Dağlıq Qarabağ arasında hadisələrin sonrakı inkişafı, o cümlədən xarici amillər nəzərə alınmaqla müzakirələrin nəticəsi ilə şərtləndirəcək. Başqa sözlə, indiki mərhələdə hökumət Qondarma Dağlıq Qarabağın müstəqilliyinin tanınması barədə qanun layihəsini bəyənməyib», - deyə sözçü qeyd edib.
Ermənistan parlamenti də müstəqilliklə bağlı qanun layihəsini mayın 10-na nəzərdə tutulan iclasın gündəliyinə salmayıb.
Separatçı rejimin tanınması barədə qanun layihəsi «İrs» partiyasından olan deputat Zarui Postancyan və eks-baş nazir, hazırda müxalif «Erməni Milli Konqresi»ndən seçilən deputat Qrant Baqratyan tərəfindən irəli sürülüb.
Bu layihəyə bu gün Ermənistan hökuməti rəy verib. Hökumət qondarma Dağlıq Qarabağ Respublikasının tanınması ilə bağlı qanun layihəsini müzakirə edərək parlamentə göndərib.
Rəydə bildirilir ki, sözügedən qanun layihəsinin qəbulu «DQR» ilə Ermənistan arasındakı müzakirələrin nəticələrindən asılıdır.
2013-2014-cü illərdə Dağlıq Qarabağın «müstəqilliyinin» tanınması ilə bağlı məsələ parlamentdə müzakirə olunub. Amma qanunverici orqan qondarma rejimin «müstəqilliyini» tanımayıb.
Rusiya Xarici İşlər naziri Sergey Lavrov İrəvanın qondarma Dağlıq Qarabağ Respublikasını tanımasına dair açıqlama verib. «Ermənistan parlamentinin Dağlıq Qarabağın müstəqilliyini tanımaqla bağlı müzakirə aparacağı ilə bağlı xəbərlərdən təlaş keçirməyə səbəb yoxdur, çünki Ermənistan bəyan edir ki, regionun statusu birtərəfli qaydada müəyyən edilməyəcək», - deyə o, «RİA Novosti»yə müsahibəsində deyib.
Nazir bildirib ki, Ermənistan bu məsələni müzakirə etmir: «Bu, parlamentin 2 üzvünün təklifidir». (ANS PRESS)
