İŞİD Bakı yolunda-terrorçuların başqa ölkələrə sızma təhlükəsi var

İŞİD üzvlərinin və oradakı azərbaycanlıların sayı ilə bağlı ən son məlumatlardan biri də mediaya ABŞ-ın "Soufan Qrup” şirkəti tərəfindən təqdim olunub. Axar.az saytının yaydığı həmin siyahıda İŞİD tərkibində 86 ölkədən olmaqla, 31 min nəfərin döyüşdüyünü yazıb. Siyahıda Şimali Afrika və Yaxın Şərq ölkələrindən olan İŞİD üzvlərinin sayının 16 min nəfərdən çox olduğu, bunların Tunis (6000 nəfər) və Səudiyyə Ərəbistanı (2500 nəfər) vətəndaşlarının çoxlu təşkil etdiyi əksini tapıb.

Qeyd edək ki, bir qədər əvvəl vesti.az saytı Suriyada döyüşən azərbaycanlıların təxmini sayını müəyyənləşdirmək məqsədilə Azərbaycanın 40 polis idarəsində sorğu keçirib. Sorğunun nəticələrinə əsasən, Suriyada Bəşər Əsədə qarşı döyüşən qruplaşmaların tərkibində Xaçmaz, Zaqatala, Qax, Yevlax, Şabran, Oğuz, Quba, Şəki, Qusar və Sumqayıtdan 104 nəfər döyüşüb, onlardan təxminən 60 nəfərə yaxını döyüşlərdə öldürülüb. Eyni zamanda Suriyaya ən çox azərbaycanlı Sumqayıt şəhərindən (40), Şabran (22) və Qusar rayonlarından (15) gedib. Sorğu zamanı Azərbaycanın əksər rayonlarında Suriyaya gedərək qanunsuz hərbi birləşmələrin tərkibində döyüşən azərbaycanlıların olmadığı müəyyənləşib.

Ancaq 2014-cü ilin yanvarında Suriyanın şimalında İŞİD və digər islamçı qruplar arasında mövqe müharibəsi başladıqdan sonra hər iki tərəfdən ölənlər arasında azərbaycanlıların olması mediada geniş əks-səda doğurdu. Yaranmış vəziyyətdən hökumət də narahat oldu və ilk dəfə geri qayıdanların həbsləri başladı, eyni zamanda Cinayət Məcəlləsində xarici ölkələrdə qeyri-qanuni silahlı birləşmələrin tərkibində vuruşanlara qarşı cəzalar sərtləşdirildi, geri qayıdanların həbsi başladı. Ümumilikdə son 2,5 il ərzində 100-ə yaxın ölkə vətəndaşı xaricdə silahlı birləşmələrin tərkibində döyüşdüyü üçün həbs olunaraq məhkum olunub.

Ancaq hazırda da İraq və Suriyada çoxlu sayda azərbaycanlı olduğu haqda məlumatlar var. Ara-sıra ictimaiyyətdə bu insanların geri qayıtması və yaranacaq təhlükələrdən bəhs olunur. Bu insanların radikal dini cərəyanların təsiri altında olması, terror fəaliyyətləri göstərməsi, dini dözümsüzlüyü olması, eləcə də müəyyən təşkilat və qruplara bağlılığı və nəhayət, müharibə yaşaması onların yenidən bu kimi fəaliyyətlərə dönməsi riskini yaradır. Bu səbəbdən də Azərbaycanda da bu istiqamətdə, yəni geri qayıdanlarla bağlı narahatlıq var. Məsələ burasındadır ki, İŞİD bu günə qədər mövcud olmuş ən güclü terror təşkilatı olub.