MTN polkovniki istintaqdan necə yayınıb

Milli Təhlükəsizlik Nazirliyindəki mütəşəkkil cinayətkar dəstənin ifşasının bir ilinin tamam olmasına az vaxt qalır. Ötən aylar ərzində prokurorluq orqanlarında MTN-dəki cinayətkar dəstənin üzvlərinə qarşı açılan cinayət işinin istintaqı davam edir. Ancaq "dəstə başçısı” Eldar Mahmudov və onun "baş torbatikəni” olan Mövlan Şıxəliyevin azadlıqda qalması cəmiyyətdə birmənalı qarşılanmır.

Bu arada ləğv olunmuş MTN-nin Istintaq Baş Idarəsinin sabiq rəis müavini Təhsin Ağayevin istintaqdan yayınması barədə məlumat daxil olub. Mənbənin sözlərinə görə, Leyla Şıxlıniskayanın klinikasında saxta epikriz yazdıran Təhsin Ağayev xəstəlik səbəblərinin əsas gətirərək, istintaqdan yayınır. Belə ki, 50-yə yaxın iş üzrə ifadə verməli olan Təhsin Ağayev istintaqın çağırışlarına epikrizlər göndərməklə məhəl qoymur. Həmin sənədlərdə guya onun ölüm ayağında olması barədə rəylər də yazılıb.

Araşdırmamız zamanı onu da öyrəndik ki, yaxınlarının toy məclislərinə qatılan və orada yallı gedən Təhsin Ağayevin səhhəti nədənsə həmin məclislərdə normal olur. Ümid edirik ki, prokurorluq orqanları fəaliyyəti dövründə saysız qanunsuzluqlara imza atan Təhsin Ağayevi və onun sifarişi ilə saxta cinayət işlərinin istintaqını aparan müstəntiq Elşən Murtuzov kimi hüquqa qəsd edən şəxsləri məsuliyyətə cəlb edəcək və məhkəmə onların layiqli cəzasını təyin edəcək. (Gununsesi.info)