Xəbərlər / Ölkə

Yol polisi ana və körpə qızı donmaqdan xilas

3-02-2017, 14:24

Bakının Qaradağ rayonunda yaşayan Xansənəm Abbas qızı Əliyeva Avtosfer.az-a yol polisi əməkdaşının hərəkətləri ilə bağlı müraciət ünvanlayıb. Amma vətəndaş bu dəfə yol polisindən şikayət etmir, əksinə, onun etdiyi insanpərvər hərəkəti cəmiyyətə çatdırmaq istəyir.
Xansənəm Əliyeva Bakı-Qazax yolunun Qaradağ rayonu ərazisindən keçən hissəsindəki kafedə ofisant işləyir. O bildirib ki, fevralın 1-də qarlı-şaxtalı havada işlədiyi kafenin yaxınlığında bir qadın və azyaşlı qız uşağı görüb. Onlar bir müddət qarlı havada yol kənarında qalıblar və bir neçə dəfə avtobus saxlatdırsalar ki, minib gedə bilməyiblər: «Uşağın vəziyyəti daha ağır idi. Üzünün rəngi qaçmışdı. Bir qədər sonra yol polisi işçisi Rəşad gəldi, həmin qadınla nəsə danışandan sonra onları kafeyə gətirdi. Qadın da, uşaq da soyuqdan donmuşdular, danışa bilmirdilər. Bir qədər sonra isinib özlərinə gəldilər. Rəşad onlara yemək aldı, sonra da pul verdi ki, taksiyə minib evə getsinlər. Qadının adı Vüsalə, uşağın adı isə Zəhra idi. Onun 3 yaşı vardı. Qadın dedi ki, Ağdaş rayonundanıq».
Avtosfer.az-ın apardığı araşdırma zamanı məlum olub ki, Rəşad adlı həmin yol polisi əməkdaşı Baş Dövlət Yol Polisi İdarəsinin Yol-Patrul Xidməti Alayının 6-cı tağımının (Qaradağ positunun) əməkdaşı, baş serjant Ağayev Rəşad Bahadur oğludur. O, əməkdaşımızla söhbətində belə bir hadisənin baş verdiyini təsdiq edərək bildirdi ki, qarlı havada gecə səhərə qədər iş başında olub. Səhər evə gedərkən yolda qadınla uşağı görüb və maşını saxlayıb: «Bakı-Qazax yolunun 15-ci km-də yerləşən müvəqqəti duracağın yanında dayanmışdılar. Onlara yaxınlaşanda dəhşətə gəldim. Vəziyyəti tam izah etməkdə çətinlik çəkirəm. Amma uşaq rəsmən donmuşdu. Qadından burada niyə dayandıqlarını soruşdum. Dedi ki, yardım almaq üçün Sosial Müdafiə Fonduna gəlibmiş. Buta qəsəbəsində yaşayırlar. Amma pul ala bilmədikləri üçün yolda qalıblar. Ağdaşa getəmilidirlər. Pulları olmadığı üçün avtobus sürücüləri onları aparmaqdan imtina edib. Buna görə də, yolda qalıblar. Ac-susuz saatlarla orada gözləyiblər. Mən də imkan dairəsində onlara kömək edib yola saldım. Yaxınlıqdakı kafeyə apardım, isindilər, yemək yedilər, sonra da pul verdim ki, rayona gedə bilsinlər.
Onlara kömək etdiyim üçün çox rahat oldum. Mən həm polis əməkdaşı, həm də vətəndaş kimi bunu etməkdən şərəf duyuram. Hər bir azərbaycanlı çətin anda bir-birinə əl tutmalıdır, kömək etməlidir. O uşağın vəziyyəti hələ də yadımdan çıxmır. İnşallah, hər ikisi sağ-salamat evlərinə çatıblar».

« May 2024 »
B.e.	Ç.a.	Ç	C.a.	C	Ş	B
		1	2	3	4	5
6	7	8	9	10	11	12
13	14	15	16	17	18	19
20	21	22	23	24	25	26
27	28	29	30	31

Qaynar xəbərlər

Yol polisi ana və körpə qızı donmaqdan xilas