Baş həkimin oğlu FETÖ-çudur?

Demək olar ki, FETÖ-nun Azərbaycan qanadı ilə bağlı hər gün mediaya yeni məlumatlar daxil olur. Verilən yeni məlumata görə,  "Star” zavodunda maliyyə direktoru olan Elçin İbadov Respublika Klinik Xəstəxanasının baş həkimi, son günlər adı mətbuatda daha çox neqativ planda çəkilən Telman İbadovun oğludur. E.İbadov və T. İbadovla bağlı son vaxtlar mətbuatda dərc olunan yazıları da təqdim edirik.

"Gənclərin sevdiyi bir oyun var: Mafiya. Bu oyunda "sakinlər” və "komisar” "Mafiya” üzvlərini tapmalı, onların da işi özlərini qorumaq və "sakin”ləri aldadaraq, qələbə qazanmaqdır. Bunun üçün bu "Mafiya” üzvləri "Polad Alemdar” kimi paltonu çiyninə aşırıb, "Varmı mənə yan baxan” demir, tam əksinə, "vurulan” "sakinlər” üçün elə yas tutur ki, kimsə "Mafiya” üzvü olduğunu anlamasın. Bəzən isə kritik anda öz "Mafiya” yoldaşını qurban verir ki, özü sona qədər davam edə bilsin.

Azərbaycanda da vəziyyət fərqli deyil. Bu gün FETÖ-nün Azərbaycanda bütün sahələrə necə çökməsi, kadrlarının hansı qurumlarda mövcudiyyətlərini davam etdirmələri deyil, Gülənin buraya gəlməsinin altında kimlərin imza atması müzakirə olunur. Bilinən bir gerçək var ki, rəhmətlik Lidiya Rəsulovadan başqa bütün təhsil nazirləri Gülənin məktəblərinin başına pərvanə olublar. Ondan öncəkilər də, sonrakılar da. Xüsusilə, Misir Mərdanovun zamanı Gülən üçün Azərbaycanda "qızıl dövr” olub. Bunu Azərbaycana ilk gələn fətullahçı Faruk Arslan öz kitabında belə vəsf edir: "Bizim üçün Lidiya Rəsulovanın Azərbaycan təhsil nazirliyi dönəmi çox çətin keçmişdi. 1998-ci ildə təhsil naziri olan Bakı Dövlət Universitetinin rektoru Misir Mərdanov ilə yeni bir dönəm başlamışdı. Nazir olur-olmaz ilk işi Türk (oxu:fətullahçı) məktəbləri tanımaq oldu. Məktəbləri tək-tək ziyarət etdi”. Əlavə şərhə ehtiyac varmı?

Məhz bunun mükafatı olaraq da, Təhsil Nazirliyində o qədər qanunsuzluqlar, yeyintilər ört-basdır edildi, təkcə yaxın qohumlarına bağışladığı mal-mülkün qiyməti milyonlarla dollar olsa da, kimsə Misir Cumayıroviçdən bunların hesabını soruşmadı. Nazirin adı dəyişsə də, gülənist şəbəkə fəaliyyətini yeni isimlərlə davam etdirdi.

Bu səbəbdən də, Misir Mərdanovun təhsil sistemində Gülən üçün tikə bilmədiklərini Mikayıl Cabbarov Aslanovun dəstəsi ilə "Sabah” kursları adı altında etməkdə davam edir. Şahin Seyidzadənin Aslanovun önəmli adamlardan biri olduğunu unutmayaq.

***

"Azərbaycan FETÖ-nü bitirdi”. "Fətullahçılar ölkədən deport olundular”. "Fətullahçıların bizə gücü çatmaz”. "Gülən məsələsi Türkiyənin daxili məsələsidir”. Bu kimi fikirlər əslində Gülənin burada fəaliyyətinin davamına hesablanıb. "Bitdi” nə deməkdir? "Bitdi” demək, əməliyyatların dayandırılması, Gülən üzərində araşdırma aparılmamasına ehtiyacın qalmaması deməkdir. Gəlin görək, vəziyyət belədirmi? Xeyr! Nə yazıq ki, xeyr!

FETÖ-yə qarşı məhz bu laqeyd münasibət gətirib onları bu həddə çıxardı. Zamanında ayrı-ayrı vətənpərvər diplomatların, məmurların bu yöndə haqlı narahatlığına əhəmiyyət verilmədi. Tam əksinə, o şəxslər ağır şəkildə cəzalandırıldılar, sürgün edildilər, işdən atıldılar. Çünki dar zehniyyətdə olan məmurlarımız hesab edirlər ki, Gülən Azərbaycanda hakimiyyətə gəlmək istəsə, partiya qurub, siyasi mübarizəyə başlayacaq və məğlub ediləcək. Səssiz işğalın fərqində olmadıqlarından əksər nazirliklərimiz, mühüm strateji qurumlarımız FETÖ təhdidi altındadır.

Haşiyə!

Əslində dövlətin Azərbaycanda FETÖ ilə bağlı araşdırmalar aparmasına ehtiyac bir o qədər də yoxdur. Çünki lazım olan əksər bilgilər (əgər yox edilməyibsə) öz məlumat mərkəzində vardır. Məsələn, 2004-cü ildə Qarsa baş konsul vəzifəsinə təyin olunan Həsən Zeynalov qısa zamanda Qarsdakı Qafqaz Universitetində (Azərbaycandakı QU ilə heç bir əlaqəsi və ya yaxınlığı yoxdur) oxuyan azərbaycanlı gənclərin necə Gülən təsirinə düşdüklərini, "İşıq” evlərində onlara yer verildiyini görür və 2005-ci ildən etibarən XİN və Prezident Adminstrasiyasına məktublar yazmağa, mövcud durumun dövlətimizin əleyhinə olduğunu anladır.

H.Zeynalov Qarsdan İstanbula təyin olunanda da başda "Palmali” olmaqla bir sıra Azərbaycanın orada Paralel Şəbəkə ilə isti münasibət quranlar narazılıq edirlər. Uzun müddət baş konsulluq "yox” sayılaraq, Ankaradakı səfirliklə işlərini görürlər. Elə, H.Zeynalov etiraz etdiyi üçün hazırda ABŞ-da yaşayan "Zaman” yazarı Mahir Zeynalovun işçi vizasını da Elnur Aslanov o zaman Ankaradan alır.

SOCAR Türkiyədə, Petkimdə baş verənlər, Azərbaycan dövlətinin hesabına maliyyələşən, ancaq başqa dövlətlərin maraqlarına xidmət edən "Xəzər” Araşdırmalar İnstitutu (HASEN) və Ceyhun Osmanlı, Elnur Aslanov, Kənan Məmmədov və digərləri ilə bağlı saysız-hesabsız "daxili arayışlar” göndərilir.

Bu səbəbdən də, dövlət FETÖ ilə mübarizədə nəticə almaq istəyirsə, o "daxili arayış”ları tozlu rəflərdən qaldırmalıdır. Həsən müəllim də susqunluğunu pozmalıdır…

***

Təkcə, Həsən müəllim də deyil, 1999-cu ildə araşdırmaçı yazar Nəcib Hablemitoğlunu (qısa müddətdən sonra FETÖ tərəfindən öldürüldü) Azərbaycana gətirərək, Gülənin alman və amerikan kəşfiyyatı ilə əlaqələrinə dair konfranslar keçirən Tənzilə Rüstəmxanlı da danışdırılmalıdır. İllərlə hər mövzuda "mütəxəssislik” edənlər barı, "Zaman Azərbaycan” ilə TİKA-nın ortaq səfərlərinin, Dialoq Avrasiya Platformunun "hədiyyə”lərinin xətrinə, komik görünən anti-gülənçiliklərinə "stop” edib, Gülənə qarşı illərin mübarizəsini vermiş bu insanlara meydanı buraxmalıdırlar.

Hazırda Gülən mövzusu elə formada işlənir ki, FETÖ-yə nifrət edənlərin belə ağlı qarışır. Ayrıca, FETÖ-yə qarşı yazıldığı görüntüsü verilən yazılarda sətiraltı olaraq, Gülənin müdafiə olunduğuna da rast gəlinir. Bu gün bir sıra saytlarda hələ də FETÖ terrorçularına "Gülən əsgərləri” deyilməkdədir. Vaxtilə, Gülənin azərbaycanlı olduğunu iddia edənlər, xarici media ilə əlaqə qurmaq adı altında QHT Şurasından aldıqları qrantla fətullahçıları ölkəmizə dəvət edənlər indi də FETÖ ilə bağlı ehtiyatlı davranırlar. Adında saxtakarlıq etdiyi illər öncə bəlli olan Fətullah Gülən hələ də "Zaman”çıların deyimi ilə "Fəthullah”, "Fethullah”, FETÖ isə "Hizmət” Hərəkatı adlandırırlar. Yəqin ki, Mətbuat Şurası bu barədə monitorinq aparsa, bizim yazdıqlarımızı təsdiqləyəcəklər. Ancaq təbii ki, qurdu quzuya, fətullahçıları araşdırmağı da Gülənin hesabına xarici səfər üzü görən "işçi”lərə tapşırmasa…

***

Bəli, Gülən Şəbəkəsinin müxalifətlə də əlaqəsi var, çünki bu bir amerikan sistemidir. Ancaq sadəcə Əli Kərimli üzərində məsələni fokuslayıb, "Azadlıq” qəzetinin maliyyə dayaqlarını dağıdıb, "FETÖ-nü bitirdik” demək, ən yaxşı halda özünü aldatmaqdır. Ayrıca, müxalifətlə FETÖ əlaqəsi axtarılırsa, bunu Faiq Əmirli deyil, Rəsul Quliyev və Qafqaz Universitetinin sabiq müəllimi Gültəkin Hacıbəyli üzərindən axtarmaq daha məntiqlidir. Bu xətt üzrə hərəkət edilərsə, daha real sonuclar əldə edilə bilər.

Ancaq o da bilinməlidir ki, Gülən Azərbaycanda ilk gündən güclünün tərəfində olub. Güc hansı tərəfdədirsə, onun yanında olub. Məhz bu şəkildə davamlı olaraq, həm Türkiyədə, həm də dünyada böyüyüb.

Bu baxımdan, Əli Kərimlinin hansı nazirlik üzərində gücü var? Əli Kərimlinin Gənclər və İdman, Vergilər, Təhsil, Mədəniyyət və Turizm, Rabitə və Yüksək Texnologiyalar nazirliklərində, Dövlət Gömrük Komitəsində(Təhsil nazirinin sabiq müavini Qulu Novruzov vasitəsi ilə qurulan qohumluq xətti Gülənə ciddi dayaq olub), Dövlət Miqrasiya Komitəsində kadrları varmı? Bir-iki simpatizanının olduğunu istisna etmirəm. Ancaq Azərbaycan hakimiyyətinə "onları Xəzərə tökərəm” mesajı verilirsə, bunun arxasında çox güclü bir şəbəkə dayanır. Bu gün adını çəkdiyimiz nazirliklərin hamısında Gülən hegemonluq edir. Təkcə onlarda da deyil. Bu gün parlamentdə, vergilər naziri Fazil Məmmədovun kurasiyasında olan holdinqlərdə, SOCAR-a bağlı şirkətlərdə, Yazıçılar İttifaqında, SAM-da, QHT sektorunda onlarla, yüzlərlə Gülən müridi mühüm postlar "işğal” ediblər.

Tutalım, Türkiyədə SOCAR-a bağlı bəzi şirkətlərdə həbslər oldu. Nə dəyişdi? Yenə aşağıdan bir neçə nəfər çıxarıldı, ancaq kök hələ də yerindədir. Kök hardadır? O "kök”ün adını yazmaq mənə 2 milyon manatlıq məhkəməyə başa gəldi. Sırf "SOCAR Azərbaycanın sərvətidir, fətullahçıları buradan təmizləyin” dediyim üçün aylarla məhkəmələrdə süründürüldüm. Bu gündə o işgəncə bitməyib. Nəticədə, zərər görən Azərbaycan dövlətidir.

Məsələn, Türkiyənin "Sabah” qəzeti bir müddət öncə yazırdı ki, "Fətullah Gülən təriqətinin enerji sektoruna yönələn strategiyalarını müəyyənləşdirən şəxslərdən biri Xəzər Strateji Araşdırmalar İnstitutunun rəhbəri Haldun Yavaşdır. Bu institutun əməkdaşlarının əksəriyyəti fətullahçılardır və ofisi İstanbulda yerləşməklə SOCAR tərəfindən maliyyələşdirilir.

İnstitut enerji sektorunda baş verənləri təhlil edib Pensilvaniyaya – Gülənin mənzil-qərargahına ötürməklə məşğuldur. Haldun Yavaş Gülənə yaxın şəxsdir və 2003-2004-cü illərdə ABŞ-dakı Nassau Community College-də "Fətullah Gülən günləri” təşkil edib.

SOCAR-dakı fətullahçılardan biri də şirkətin Türkiyədəki baş hüquq müşaviri Fatih Yigitdir. O, Gülənin şəxsi həkiminin kürəkənidir və "SOCAR Turkey Energy” şirkətinin icraçı direktorunun birinci müavini olan Samir Kərimli (hazırda SOCAR prezidentinin müşaviridir) üzərində güclü təsirə malikdir. Əgər təriqətin hansısa tələbi SOCAR-ın azərbaycanlı rəhbərlərinə çatdırılmalıdırsa, bunu Fatih Yigitin köməyi ilə edirlər”. Yazıda qeyd olunurdu ki, "Türkiyədə böyük investisiyalara malik olan SOCAR-da təşkilatlanmış fətullahçıların fəaliyyətinə son qoyulması Ankaranın Bakıdan əsas tələblərindən biridir. Bunların arasında Samir Kərimlinin adı xüsusi qeyd edilir. Onun Fətullah Gülənə yaxın olmaqla bərabər ABŞ-la da sıx əlaqələri var. Samir Kərimlinin 2013-cü ildə SOCAR-ın gizli maliyyəsi ilə bir qrup Konqres üzvünün Bakıya səfərini təşkil edən fətullahçı Kemal Öksüzlə yaxın təmaslarının olduğu da bildirilir. S.Kərimli həmin podratçı şirkətlərin köməyi ilə tenderlərdən və görülən işlərdən Gülən təriqətinə mənsub iş adamlarına pay verir, bununla da "paralel dövlət”ə maddi dəstək təmin edir. İddiaya görə, "SOCAR Turkey”in icraçı direktoru Kenan Yavuz şirkətdəki fətullahçılar tərəfindən neytrallaşdırılıb və qərarlara təsir edə bilmir”.

Ləğv olunan MTN-dəki cəllad qruplaşmasının general üzvlərindən olan Samir Kərimli Türkiyənin təzyiqi ilə "SOCAR Turkey Energy”dən uzaqlaşdırıldı. Əvəzində isə ona Bakıda SOCAR prezidentinin müşaviri vəzifəsi verildi. Yəni, Qafqaz Universiteti necə Gülənin sağ cibindən sol cibinə qoyuldusa, eləcə də S.Kərimli də bu şəkildə qorundu.

Təkcə Samir Kərimlimi qorundu? İlham Mehrəliyevi tanıyırsınızmı? Modern Qrupun rəhbəri idi. Sonra öncə SOCAR-ın vitse-prezidenti Xalik Məmmədovun, daha sonra SOCAR prezidentinin köməkçisi oldu. Hazırda isə SOCAR-da Daşımalara Nəzarət Departamentinin rəisidir. Bir-iki ilin içərisində bu qədər sürətli vəzifə dəyişiminin səbəbi nədir? Bu şəxsi niyə birdəfəlik uzaqlaşdıra bilmirlər? Azərbaycanlılardan ibarət "Beyin mərkəzi”nin imamı olduğuna görə, ola bilərmi?

Mövzu isimlərdən düşmüşkən, Ceyhun Osmanlı kanalı ilə SOCAR-a yerləşdirilənlərdən birinin də adını xatırlayaq.

Elçin İbadov. "PricewaterhouseCoopers” adlı audit şirkətinin rəhbərliyindən "Star” zavoduna maliyyə direktoru olan bu şəxs eyni zamanda Ceyhun Osmanlının çox yaxın dostudur. Belə ki, "Star”da vəzifəyə gəlmədən öncə, dəfələrlə "İrəli”nin tədbirlərinə qatılan "PwC” akademiyasının rəhbəri Elçin İbadov eyni zamanda Qafqaz Universiteti ilə çox isti münasibətləri var.

Söz düşmüşkən, Qafqaz Universiteti ilə bağlı SOCAR daxilindəki fətullahçı qruplaşmanın yazdırdığı şübhə doğurmayan bir materialda qeyd olunur ki, "Elmar Qasımov qısa zamanda fətullahçıları müəyyənləşdirdi və universitetdən uzaqlaşdırdı”. Bəyəm fövqəladə müəyyənləşdirmə əməliyyatına ehtiyac var idi? İkincisi türk fətullahçılarla Şaiq Nəbiyev çıxarılsalar da, digərləri yerlərində durur. Üçüncüsü, Elmar Qasımov illərlə Ənvər Özərənlə olan yaxın münasibəti gözardı edilməməlidir. Qafqaz Universitetinin hələ də Xalik Məmmədovun nəzarətində olması və E.Qasımovun oraya rektor gətirilməsi bu təhsil ocağı ilə bağlı şübhələri dağıtmır, tam əksinə, artırır.

***

Söhbət Gülənin hakimiyyət içindəki nüfuz agentlərindən düşmüşkən, İntiqam Babayev-Fərhad Məmmədov-İxtiyar Hüseynli-Elşad İskəndərov-Orxan Əkbərov-Elnur Aslanov-Ceyhun Osmanlı "bro”larını unutmaq olmaz. "Sadval”ın ideoloqlarından biri olduğu deyilən, sırf oğlunun yolunu açmaq üçün Alla Puqaçova yaşında "Putinin dostu” adı ilə alver edən İlham Rəhimovla evlənən Rəbiyyət Aslanovanın oğlunun dövlət içində nə qədər güclü olduğunu anasının bundan öncəki parlament seçkilərində rəqibi olmuş YAP-çı Məhəmməd Nooyev açıqlayır. Onun sözlərinə görə, E.Aslanov o zaman seçkiyə müdaxilə etməklə qalmamış, hətta Nooyevin Vergilər Nazirliyində işləyən qardaşı oğlunu belə vəzifəsindən çıxartdırıb. Həm də məzuniyyətdə ola-ola…

Təkcə bu fakt E.Aslanovun dövlət içində qollarının haralara uzandığını göstərməkdədir. Vergilər Nazirliyi daxilində Ağasəməd Əfəndiyev, Şaiq Xəlilov, Mehdi N. kimi şəxslər olduqca, E.Aslanovun "qollar”ını oradan sökmək çətin məsələdir. Ancaq Elnur Aslanov təkdirmi? Xeyr. Gülən 25 illik planını bir şəxsin üzərində quracaq qədər cahil deyil.

İstər Elnur Aslanov, istər İxtiyar Hüseynli, istər Ceyhun Osmanlı olsun, bunlar bir komandaydı. Ancaq Gülənin Azərbaycanda "Beşinci kalon”u bitməz… İfşa olunanlar bir tərəfdə görünər, ancaq millət onlara baxarkən, üçüncü-dördüncü qruplar işi bitirərlər. Necə ki, Elnur Aslanov kölgədə olsa da, "Bakı 2015″in hazırda da ölkədəki beynəlxalq tədbirləri həyata keçirən onun Xaqani Fərəcov, Ramin Həkimov və digər komanda üzvləridir. Gənclər və idman naziri Azad Rəhimov hələ də bütün beynəlxalq lahiyələri Aslanov-Osmanlı qrupundan olan gənclərə əmanət etməkdədir.

***

Gülənçilərin tövsiyyəsi ilə tələbə ikən "Azərbaycan Könüllüləri”İctimai Birliyini quran Ceyhun Osmanlı son çıxışlarında deyir ki, "bizim adımızı çəkənlər həqiqi nurçuları gizlətmək istəyir”. Özü haqqında yazılara Fazil Mustafanın adlandırdığı tərzdə münasibət bildirən deputat nədənsə, çox yaxın keçmişi unudub. Ümumi sözlərlə, FETÖ əleyhinə bir cümlə belə işlətmədən verdiyi müsahibələrdə nədənsə, Ənvər Özərən, Əhməd Sanıc və digər fətullahçılarla olan əlaqələrindən bəhs etmir. Gülənin biznes imamı, TUSKON başqanı Rizanur Meral ilə görüşündən, birlikdə qatıldıqları "İpək yolu” Təşkilatının açılışını unutmuşa bənzəyir. Ancaq biz onun yaddaşını təzələyə bilərik. Məsələn, heç bir ciddi dəstək vermədikləri, hətta canlı yayın maşınlarını belə "Bengütürk”ün gətirdiyi halda Ceyhun Osmanlı "Samanyolu” Qrupun hesabına hansı səbəbdən 800 min dollar yatırdı? Dövlətin Xocalının təbliğatı üçün ayırdığı 2 milyonun neçə faizi təyinatı üzrə xərcləndi? Ümumiyyətlə, dövlət nə üçün Ceyhun Osmanlı və Rauf Mərdiyev dönəmində "İrəli”yə ayrılan milyonlarla manatın aqibəti ilə maraqlanmır? Xırda bir dükana beş əməliyyatçı göndərən Vergilər Nazirliyi nə üçün bu QHT-nin fəaliyyətini şəfffaf araşdırmır? "İrəli”nin Mirhəsən Seyidova qədərki dönəmdə "həyata keçirdiyi” hansı lahiyə bu gün aktivdir? Maraqlıdır ki, deputat mandatının istifadə müddəti bitər-bitməz Ukraynada tikinti biznesinə qoşulan Osmanlının sərmayəsinin neçə faizini illərdən bəri topladığı qrant pulları təşkil edib? Suallar çoxdur, fəqət nə Gülənin "yeniçəri”si, nə də onun fəaliyyətini təftiş etməli olan qurumlardan səs çıxır.

Sonda qeyd edək ki, dövlət içindəki bu şəbəkə "qohum-tanış” faktorları nəzərə alınmadan ifşa edilib, cəzalandırılmayacağı təqdirdə, 15 iyulumuz heç də uzaq deyil… Bu problemin tək həlli isə Gülənə bulaşmamış məmurların Prezidentin FETÖ ilə mübarizəsinə real dəstək verməsindən keçir… İsmət İnönü demişkən, bir məmləkətdə namuslular namussuzlar qədər cəsarətli olmadıqca, o ölkənin xilas olması imkansızdır”…

***

M.Ə.Mirqasımov adına Respublika Klinik Xəstəxanasının problemləri bu gün ölkə ictimaiyyətini narahat edən ən aktual məsələlərdən biridir. Təbii ki, bu aktuallığı şərtləndirən ən vacib cəhət xəstəxanada baş verənlərin vətəndaşlarımızın həm fiziki, həm də mənəvi durumlarına bilavasitə təsir etməsidir. Ölkənin bu ən böyük tibb müəssisəsində baş verənləri isə heç də proqressiv və ürəkaçan hallar kimi qiymətləndirmək olmaz.

Rüşvətxorluqla savaşırıq, ya barışırıq?

Bu Hamletsayağı sual Klinik Xəstəxananın giriş qapılarından içəri daxil olduğu andan, buranı sağ-salamat (əgər müyəssər olarsa) tərk edənə qədər hər bir vətəndaşın beynini dələn əsas suala çevrilir. Bəlkə də kiməsə belə bir sualın ciddi problem formasında ortaya qoyulması gülünc görünə bilər. Amma bu zaman əminliklə demək olar ki, həmin insanın nə özünün, nə də yaxınlarının səhhətində heç bir problem yaşanmır. Əlbəttə, əgər siz Respublika Klinik Xəstəxanasında müayinə olunmaq və ya müalicə almaq məcburiyyətində deyilsinizsə, bu zaman korrupsiya və rüşvətxorluğa qarşı istənilən şüarı da cəsarətlə irəli sürə bilərsiniz. Əks halda isə… Əks halda isə əliniz cibinizdə, diliniz də boğazınızda olmalıdır. Hərçənd üçüncü, alternativ variant da var – xəstəniz qucağınızda qala bilər. Klinik xəstəxananın liftindən tutmuş reanimasiya otağına qədər hər yerdə rüşvət, qeyri-qanuni pullu xidmət baş alıb gedir. Liftlə qalxmaq üçün 40 qəpik, ayaqyoluna getmək üçün isə 20 qəpik ödəməlisən. Xəstəxananın giriş-çıxış qapısında da rüşvətsiz ötüşmək olmur. Belə ki, xəstəxananın həyətindən çıxan maşınlardan 1-2 manat alan mühafizəçi heç də həkimlərdən geri qalmır. Amma bunlar hələ necə deyərlər, içəridə təqdim olunan əsil tamaşanın sadəcə üvertyurasıdır. Məlum oluğu kimi dünyanın heç bir xəstəxanasında reanimasiya otağına kənar şəxslər buraxılmır. Ancaq Respublika Klinik Xəstəxanasında bu sahədə də vəziyyət fərqlidir. Kimin pulu varsa, ürəyi nə vaxt istəsə, ora girə bilir. Pulunuz varsa, 10-20 manat verin, keçib xəstənizi görün. Reanimasiya otağının qapısı önündə xəstələrindən xəbər gözləyən vətəndaşlar isə reanimasiya otağındakı həkimə və tibb bacılarına hər gün pul verdiklərini deyirlər: "Pul verməsək, xəstəmizə yaxşı baxmırlar. Xəstəmiz ağır vəziyyətdə reanimasiyaya yerləşdirilib. Reanimasiya otağında xəstəmizə yaxşı nəzarət olunsun deyə içəridəki həkimə hər gün 20-30 manat arası, tibb bacılarına 5-10, sanitara isə 3-5 manat veririk. Bu pulu verməsək, xəstəmizə yaxşı nəzarət olunmur. Buranın pullu xəstəxanalardan heç bir fərqi yoxdur. Sadəcə olaraq, adı dövlət xəstəxanasıdır”. Ultrasəs müayinəsinin aparıldığı kabinetdə də konkret tariflər müəyyənləşdirilib. Məsələn zobdan müayinə olunmaq istəyirsənsə15-20 manat ödəməlisən. Qadınlarda daxili orqanların kompleks müayinəsi isə 100 manata başa gələcək. Bundan başqa burada qanın ümumi analizi 10, qanda qlükozanın müəyyən olunması 5, sidiyin ümumi analizi 8, böyrək analizləri 35, QİÇS analizi 10, adi həkim müayinəsi 25, professor müayinəsi 70, ginekoloji yoxlanma 50 manata başa gəlir. Döş qəfəsinin rentgeni üçün 15-25 manat ödəmək lazımdır. Daxili orqanların ümumi müayinəsi isə 160 manatdır.

Ailə neçə nəfərdən ibarət olmalıdır?

Hələ bir neçə il bundan əvvəl orta statistik Azərbaycanlı ailəsində 3-4, bəzən isə daha çox uşağın olması normal hal idi. Amma bu gün yeni ailə quran gənclər dünyaya övlad gətirmək qərarına gəlmək üçün xeyli düşünüb, götür-qoy etməli olurlar. Respublika Klinik Xəstəxanasının doğum şöbəsinin baş həkimi Zəhra Abbasovanın "iş üsulları” ilə tanış olanlar isə hətta iki dəfə düşünürlər. Belə ki, şöbəyə bitişik gözləmə otağında yeni körpənin dünyaya gəlişini gözləyən gənc ataların əhval ruhiyyəsində hər zaman sevinc hissindən daha çox bir narahatlıq hiss olunur. Daha çox Zara xanım kimi tanınan baş həkimin təyin etdiyi qiymətlər cədvəli isə bu narahatlığın əsassız olmadığına bir sübutdur.

Məsələn, həyat yoldaşının qeysəriyyə əməliyyatı ilə ana olacağını deyən bir vətəndaş bunun üçün həkimə 700 manat ödəməli olacaqlarını bildirdi. Lakin bu məbləğə hələ gələcək ananın xəstəxanada qalmaq pulu daxil deyil. Nisbətən daha rahat palatada qalmaq üçün xəstə əlavə 50 manat da ödəməlidir. Adi doğuş üçün isə xəstələr 400-450 manat ödəməli olurlar. Qeysəriyyə əməliyyatına girənləri isə hələ əlavə xərclər də gözləyir. Belə ki, əməliyyata girmədən öncə xəstənin yaxınlarına əməliyyat üçün lazım olan və olmayan dərmanların, preparatların böyük bir siyahısı verilir. Bunları almaq üçün də aptekdə orta hesabla 50-80 manat pul xərclənir. Belə prosedurları keçənlər isə iddia edirlər ki, verilən siyahıda yoddan tutmuş həkim üçün rezin əlcəklərə qədər hər şey nəzərdə tutulur. Halbuki xəstəxanalarda xəstələrə pulsuz verilən dərmanların siyahısı olur. Lakin bütün bunlar içəridə anaları gözləyən daha çətin sınaqların yanında heç nədir. Dəqiq məlumatlara görə xəstəxanada hər ananın gündəlik 15-20 manat əlavə xərci çıxır. Uşaq həkiminə, hər gün uşağa baxan növbətçi tibb bacılarına mütləq hörmət olunmalıdır. Əks halda uşağa yaxşı qulluq edilməz və ya muştuluq xətrinə hətta göbəyi də tez qoparıla bilər. Hətta otağı təmizləyən, evdən gəlmiş yemək çantasını anaya çatdıran xadiməyə də hər gün hörmət olunmalıdır. Həm də bu əlavə xərclər guya ki, Zara xanıma aid olmadığı halda, əslində şöbənin istisnasız bütün işçiləri müdirəyə gündəlik haqq çatdırmalıdırlar. Yeri gəlmişkən Zara xanımın "müəssisəsi” müştərilərə VİP xidmətlər də təklif edir. Belə ki, adi palatadan fərqli olaraq əgər otaqda bir soyuducu və bir də televizor varsa, həm də ayaqyolu cəmi iki palata üçün nəzərdə tutulubsa bu artıq "lüks otaq” sayılır və onun qiyməti də bir qədər fərqlidir…

Gözünüzə su verin…

M.Ə.Mirqasımov adına Respublika Klinik Xəstəxanasının göz xəstəlikləri şöbəsində baş verənlər isə əslində ayrıca bir material üçün mövzudur. Sözün düzü qəzetimizin ötən saylarında biz, məhz elə bu mövzu ətrafında bir neçə məqalə də dərc etmişdik. Həmin materiallarda öz oxucularına daha çox Sövdəyar Zəngilanlı kimi tanış olan şair-publisist, tarixçi-yazıçı Sövdəyar Muradovun 2012-ci ilin 6 aprel tarixində Kliniki Xəstəxananın göz xəstəlikləri şöbəsində, həkim Qalib İsgəndərov tərəfindən sağ gözündə əməliyyat olunmasından sonra yaranmış ciddi fəsadlardan bəhs olunurdu. Belə ki, əməliyyatdan bir gün sonra, sarğılar açılarkən xəstə aşkar edib ki, onun əməliyyat olunan gözü görmür. Sövdəyar müəllim bu barədə həkimin köməkçisi olan Nərgiz xanıma da deyib. Lakin, tibb işçisi bunun müvəqqəti hal olduğunu bildirərək xəstəni arxayınlaşdırıb. Növbəti on beş gün ərzində, yəni aprel ayının 21-nə qədər Qalib həkimin rəhbərliyi ilə intensiv müalicə kursu keçilib. Lakin istifadə olunan inyeksiya və damcılar da heç bir nəticə verməyib. Sövdəyar müəllim bildirir ki, may ayına qədər heç bir irəliləyiş hiss etmədiyindən gözünü BDU-nin poliklinikasında yoxlatdırmaq qərarına gəlir. Burada aparat 2% görmə dərəcəsi müəyyənləşdirir. Bundan sonra S.Muradov gözünü Yasamal r-n 19 saylı poliklinikasında, may ayının sonunda isə Zərifə Əliyeva adına Göz İnstitutunda yoxlatdırır. Bütün hallarda görmə 2% müəyyənləşdirilir. Artıq noyabr ayında xəstə Səhiyyə Nazirliyinə müraciət edir. Nazirlikdən Poladov adlı bir nəfərlə məktubu Respublika Xəstəxanasının baş həkimi Telman İbadova göndərirlər. Az müddət sonra isə Sövdəyar Muradov baş həkim Telman İbadovun imzası ilə bir məktub alır. Həmin məktubda bildirilir ki, Sövdəyar Muradov guya ki, 3 saylı poliklinikada müalicə aldığına görə bütün iradlar da həmin müəssisəyə yönəldilməlidir. Mərkəzi Xəstəxana isə Sövdəyar müəllimin gözündəki problemə görə heç bir məsuliyyət daşımır. Hal bu ki, Sövdəyar Muradov 3 saylı poliklinikanın yerləşdiyi ərazini belə tanımır. Beləliklə baş həkim rəhbərlik etdiyi xəstəxananın və burada çalışan həkimlərin nüfuzunu qorumaq üçün saxtakarlığa əl atmaqdan belə çəkinmir. Azərbaycan Respublikası Cinayət Məcəlləsinin müvafiq maddəsinə görə isə rəsmi sənədlərin saxtalaşdırılması 3 ildən 5 ilədək müddətə azadlıqdan məhrum etməklə cəzalandırılır. Amma görünür həm cərrah Qalib İsgəndərov, həm də baş həkim Telman İbadov bu dəfə də cəzasız qalacaqlarına tam əmindirlər.

Mövzuya yenidən qayıdacağıq