Siyasət

İqbal Ağazadə bütün siyasi qüvvələri, hakimiyyəti barış və dialoqa, milli həmrəyliyə çağırdı

1-01-2016, 14:45
İqbal Ağazadə bütün siyasi qüvvələri, hakimiyyəti barış və dialoqa, milli həmrəyliyə çağırdıÜmid Partiyasının sədri, millət vəkili İqbal Ağazadə xalqımızı Dünya Azərbaycanlılarının Həmrəylik Günü və Yeni il münasibətilə təbrik edib.
Təbrikdə deyilir:
Hörmətli həmvətənlərim!
Sizi 31 dekabr Dünya Azərbaycanlılarının Həmrəylik Günü və qarşıdan gələn Yeni il münasibətilə təbrik edir, hər birinizə uzun ömür, can sağlığı, ailə səadət, işlərinizdə uğurlar arzulayıram.

Ötən əsrin 88-ci ilində Azərbaycanda başlayan xalq hərəkatının gedişində 31 dekabr 1989-cu ildə Araz çayı boyunca uzanan və bizi cənublu soydaşlarımızdan ayıran tikanlı məftillərin sökülməsi xalqımız üçün önəmli bir tarixə və birlik rəmzinə çevrildi. Həmin gün istər Quzeyli, istər Güneyli, istərsə də dünyanın müxtəlif ölkələrində yaşayan soydaşlarımız arasında həmrəylik günü kimi qeyd edilir. 

İlin bu son anlarında dünyanın ayrı-ayrı nöqtələrində, o cümlədən planetin 70-dən artıq ölkəsində Azərbaycan ruhunu yaşadan bütün bacı və qardaşlarımızı Milli Həmrəylik Günü və yeni il münasibətilə təbrik edir, milli haqları uğrunda mübarizə aparan soydaşlarımızın hər zaman yanında olacağımızı bir daha bəyan edirik.
2015-ci il xalqımız üçün heç də uğurlu bir il olmadı. 2 ağır hadisənin- 19 may tarixdə 16 mərtəbəli binanın yanmasının və Günəşli yatağında baş verən yanğının acısını yaşamalı olduq. Milli valyutamızın ucuzlaşması , artan işsizlik, iqtisadi böhran bayram ovqatını azaltsa da, nikbin olmalı, sabaha ümidlə baxmalıyıq.

Arzu edirəm 2016-ci il xalqımız üçün sülh, əmin-amanlıq, iqtisadi-siyasi sistemdə yeni dövrün başlanması, dialoq, barış, həmrəylik, siyasi məhbusların azad oluması, ölkəmizin demokratikləşməsi, Azərbaycanın ərazi bütövlüyünün təmin edilməsi, Günüeyli soydaşlarımızın öz haqlarına qovuşması ili olsun.

Bu bayram günlərində fürsətdən istifadə edib bütün siyasi qüvvələri, hakimiyyəti barış və dialoqa, milli həmrəyliyə çağırıram. Azərbaycanımızın nicatı, xalqımızın rifahı və əmin-amanlığı, dövlətçiliyin qorunması, ölkəmizin ərazi bütövlüyünün təmin edilməsi bunu tələb edir.

Bir daha həmvətənlərimin hər birini Milli Həmrəylik Günü və Yeni il münasibətlə təbrik edir, 2016-ci ilin millətimizə, dövlətimizə, xalqımıza xeyirli, uğurlu olmasını diləyirəm.
Bayramınız mübarək!

Administratorla əlaqə

077 611-55-22

[email protected]