Ölkə

Bakının mərkəzində QAZ BÖHRANI - Rövnəq Abdullayevdən Prezidentə şikayət

16-02-2017, 14:25
"ERMƏNİ KİLSƏLƏRİNƏ PULSUZ QAZ VERƏN RÖVNƏQ ABDULLAYEV BAKININ MƏRKƏZINDƏ BİZƏ PULUMUZLA QAZ VERMİR”

Bakının mərkəzi hissəsində, əsasən "Kubinka” adlanan ərazidə, Rusiya səfirliyinin yaxınlığındakı evlərə aylardır, qaz verilmir.

Bu barədə məlumatı BakiPost.az-a sakinlər veriblər. Onların sözlərinə görə, dəfələrlə aidiyyəti qurumlara müraciət etmələrinə baxmayaraq, problem öz həllini tapmır: "Soyuqlar düşəni az qala hər gün "Azəriqaz”a müraciət edirik, qaynar xətti yığırıq, amma heç bir fayda yoxdur. Gündüzlər demək olar ki, qaz verilmir, gecə 12-dən sonra isə cüzi, şam işığı kimi qaz verilir. Onla da nə ev qızdırmaq olur, nə də yemək bişirmək”.

Sakinlər bildirirlər ki, vəziyyət dözülməz həddədir: "Heç bilmirik nə edək. Bu ərazilərdə yaşayanların çoxu kasıb adamlardı. Qaz verilmədiyindən hamı məcburən elektrik enerjisindən istifadə edir. Təsəvvür edin ki, mənzillər elektriklə isidilir, eləcə də mətbəxdə görülən işlərin hamısı. Bu da əziyyət, həm də artıq xərclərin hesabına başa gəlir. Soyuq aylarda 200 manata yaxın işıq pulu ödəməyə məcbur qalırıq”.

Şikayətçilər qazın verilməməsinə görə sakinlərə əlavə ziyanların dəydiyini də bildiriblər: "Evlərin əksəriyyətinə quraşdırılan "kombi”lər qaz verilmədiyinə görə işləmir. Ona görə də qar yağanda, şaxta olanda görə bəzi evlərdəki "kombi”lər donub sıradan çıxıb”.



Şəhər sakinləri problemin səbəblərini belə izah ediblər: "Bizim rayonun qaz idarəsinin rəhbərliyi məsələni yaxşı bilir. Ona görə də şikayətimizə baxmırlar. Bu ərazilərdə bir neçə çörək sexi və şirniyyat evləri fəaliyyət göstərir. Bizə çatan məlumatlara görə onlara onlara, qeyri-qanuni, qydiyyata alınmayan- sayğacsız xətlər veriblər. Onlarda xətlərinə nasos quraşdırıblar. Ona görə də əhaliyə qaz gəlib çatmır. Həmin bu, sexlər müdirlərin əlavə qazanc yeri olduğundan şikayətləri görməzdən gəlir”.

Heç bir qurumda səsi eşidilməyən sakinlər, məcbur qalıb ölkə başçısına müraciətlər ediblər: "Cənab Prezidentə teleqram vurumuşuq, saytına yazmışıq. Bəlkə o göstəriş versə, bizim dərdimizə bir əlac qılarlar”.



Məsələ ilə bağlı Azəriqaz” Qapalı Səhmdar Cəmiyyətinin mətbuat xidmətinin İbrahim Kərbalayev BakiPost.az-a bildirib ki, həmin problemi araşdırmaq üçün əraziyə mütəxəssislər göndəriblər.

Sakinlər isə bildirib ki, hər dəfə müraciət edəndən sonra bir-neçə nəfər əraziyə gəlib, mənzillərə baxış keçirib gedirlər, amma heç bir nəticəsi olmur: "Hər dəfə gəlib baxıb, başlarını yelləyib gedirlər. Erməni kilsələrinə pulsuz qaz verən Rövnəq Abdullayev Bakının mərkəzində bizə pulumuzla qaz vermir ki, vermir...”

Qeyd edək ki, əhaliyə qaz verilməsiylə bağlı şikayətlər demək olar ki, hər gün sosial şəbəkələrdə və mediada tirajlanır. Şikayətlərdə əsasən qazın zəif və ya qaz əvəzinə hava verilməsi qeyd olunur.

Administratorla əlaqə

077 611-55-22

[email protected]