9 QHT-nin hesabından həbs götürülüb

"Ötən il Azərbaycanda 9 Qeyri-Hökumət Təşkilatının (QHT) hesabından həbs götürülüb, 8 QHT-yə qarşı açılmış cinayət işinə son qoyulub".

Xeberman.com Trend-ə istinadən xəbər verir ki, bunu Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının 2016-cı ilin yekunlarına həsr olunan tədbirdə Şura sədri, millət vəkili Azay Quliyev deyib.

Onun sözlərinə görə, 2016-cı ildə 556 QHT-nin layihəsi Şura tərəfindən maliyyələşdirilib:

"Şuranın qarşısında duran əsas məsələlərdən biri QHT-lər üçün informasiya dəstəyinin təmin edilməsidir. Ötən il Şura QHT-nin üzləşdiyi problemlərin həlli istiqamətində də çox fəal iştirak edib. Bir çox QHT-lərin üzləşdiyi problemlərlə əlaqədar hökumətlə dialoqda olub və nəticədə 9 QHT-nin hesabından həbs götürülüb, 8 QHT-yə qarşı açılmış cinayət işi və yaxud vergi orqanları tərəfindən başlanmış istintaq-əməliyyat işlərinə son qoyulub, bir QHT haqqında başlanmış cinayət işi isə dayandırılıb. Eyni zamanda, 10-larla QHT nümayəndələrinə sərhəd-keçid məntəqələrində tətbiq edilən məhdudiyyət və yaxud yoxlamalar aradan qaldırılıb. 15 QHT-nin qeydiyyat problemi öz həllini tapıb".

Daha sonra qurumun icraçı direktoru Fərasət Qurbanov hesabat xarakterli məruzə ilə çıxış edib. Tədbirdə ötən il fərqlənmiş QHT nümayəndələri mükafatlandırılıblar. Tədbir müzakirələrlə davam edib.