Gündəm

“BULAQ”DAKI QANLI “RAZBORKA”DA QUMARXANA KRALI “QARA VƏZİR”İN OĞLU TOFİQ İZİ… – TƏFƏRRÜAT

26-05-2016, 09:05

Aprelin 21-də Bakının Badamdar qəsəbəsindəki "Bulaq” restoranında atışma qeydə alınmışdı. İlkin məlumatlarda qeyd olunurdu ki, restoranın müştəriləri arasında iri məbləğdə pul üstündə mübahisə olub. İnsidentin iştirakçıları restorana məhz bu məsələnin müzakirəsi üçün toplaşıblar. Samir adlı qonaq söhbətə odlu silahla gəlib. Və elə restoranın həyətində atəş açmağa başlayıb. Nəticədə bir neçə nəfər yaralanıb.

"Yeni Müsavat”a daxil olan məlumata görə, hazırda həbsdə olan Samir Allahyarovu restorana iş adamı Tofiq Qaranizadə çağırıb. Buna səbəb isə özünün hədələnməsi olub. Onu restorana dəvət edənlər biznesindən ayda onlara müəyyən məbləğ vermələrini tələb ediblər. T.Qaranizadə isə S.Allahyarovu ora söhbəti davam etdirməyə, tələbin rədd edilməsində ona yardımçı olmağa çağırıb. Nəticədə atışma düşüb, söhbətin bir neçə iştirakçısı yaralanıb, güllələrdən biri ABŞ-ın Azərbaycandakı səfirinin müavini Derek Hoqanın maşınına dəyib.

Amma xoşbəxtlikdən maşının sürücüsünə xətər toxunmayıb. Olaydan sonra Samir Allahyarov polisə gedərək könüllü təslim olub. Hazırda Bakı Şəhər Prokurorluğu tərəfindən araşdırma aparılır. Hüquq-mühafizə orqanları keçirdikləri əməliyyat zamanı biləvasitə "razborka”da iştirak etmiş Sabunçu qəsəbəsi sakinləri – 1983-cü il təvəllüdlü Namiq Xabulla oğlu İbayev, 1985-ci il təvəllüdlü Kamil İsrafil oğlu Quliyev, 1980-ci il təvəllüdlü Orxan Rəfail oğlu İbrahimov və 1981-ci il təvəllüdlü Namiq Ağacan oğlu Həşimov saxlanılıblar. Hüquq-mühafizə orqanlarına yaxın mənbədən "Yeni Müsavat”a daxil olan xəbərə görə, ümumilikdə iş üzrə 21 nəfər həbsə alınıb, ittiham elan olunaraq təqsirləndirilən şəxs qismində istintaqa cəlb edilib. Olayda iştirak etmiş şəxslərin yaxın əhatəsinə daxil olan 48 nəfər isə inzibati qaydada 10-15 sutkalığına həbsə alınıblar.

Olaydan sonra "Bulaq”dakı atışmanın kriminal aləmin iki nüfuzlu siması – "Lotu Quli” kimi tanınan Nadir Səlifov və "Rövşən Lənkaranski” kimi tanınan Rövşən Canıyevin tərəfdarları arasındakı "razborka” olduğu haqda xəbərlər də dolaşırdı. "Lotu Quli”nin yaxın atrafına aid olan şəxslərin virtualaz.org-a verdikləri məlumata görə, nə "Bulaq” restoranında atəş açanın, nə də sonradan saxlanılan şəxslərin Nadir Səlifova heç bir aidiyyəti yoxdur. Kriminal avtoritetin yaxın dairəsində belə hesab edirlər ki, bu cür şayiə yayanlar və onun adını hallandıranlar bununla Nadir Səlifovun Gürcüstana gözlənilən ekstradisiyasını əngəlləmək və onunla «Rövşən Lənkəranski» arasında qarşıdurma yaratmaq istəyirlər. Məlum olduğu kimi, Nadir Səlifov Gürcüstan vətəndaşıdır və uzun müddətdir ki, ora ekstradisiya olunmaq istəyir. Kriminal avtoritetin yaxın ətrafına aid şəxslər də bildirirlər ki, "Lotu Quli” Azərbaycanda heç bir fəaliyyət göstərmir və onun yeganə istəyi vətəndaşı olduğu Gürcüstana ekstradisiya edilməsinə nail olmaqdır.

Azinforum.az olaraq bildiririk ki, həmkarlarımızın apardıqları bu araşdırmada yaranmış münaqişəyə səbəb olan  konkret adamın adı tam dəqiqliyi ilə  çəkilmir. "Bulaq”dakı atışmanın iş adamı kimi təqdim edilən Tofiq Qaranizadəyə görə olduğu dəqiqdir. Ancaq araşdırmanı aparan həmkarlarımız onun soyadını səhv olaraq Qaramizadə kimi qeyd edirlər.   Azinforum.az olaraq biz Tofiq Qaranizadənin kimliyi barədə  dəqiq məlumat əldə etmişik.

Əslən Gürcüstandan olan Tofiq əvvəllər hüquq-mühafizə orqanlarında çalışıb. O, Bakının qumarxana krallarından biri kimi adı hallanan "Qara Vəzir”in oğludur və atasının "biznesində” ona yaxından kömək edir.

Qeyd edək ki, sovetlər dönəmində bir sıra yüksək vəzifələrdə çalışan Vəzir Qaranizadə uzun müddətdir ki, paytaxtda fəaliyyət göstərən  gizli qumarxana biznesində "Yeraz Mehman”, "Qobulu Nahib” kimi adamlarla rəqabət aparır.  Düzdür, "Quli”yə yaxın olan dairələr  Nadir Səlifovun  bu hadisəyə aidiyyəti olmamasını inkar edirlər. Ancaq "Qara Vəzir”in oğlu Tofiqin bir həmyerli  və qumarxana işi ilə məşğul olan şəxs kimi "Quli”ilə əlaqələrinin olmaması inandırıcı görünmür. Hətta bəzi ehtimallara görə, "Qara Vəzir”in dairəsilə "Quli”nin yaxın münasibəti var. Ən böyük ehtimallardan biri də budur ki, "Bulaq”dakı "razborka” nın detallarından biri də gizli qumarxanalarda dövr edən "qara” pulun hansı kriminal avtoritetə çatması ilə bağlı olub. Mövzuya qayıdacayıq…

RÖVŞƏN ƏLİ

AZİNFORUM.AZ

Administratorla əlaqə

077 611-55-22

[email protected]