“İdman tariximizdə növbəti qızıl mərhələ” layihəsinin bağlanış mərasimi keçirilib.

03 iyun 2016-cı il tarixdə Nərimanov Rayon İcra Hakimiyyətində Azərbaycan Respublikasının Prezidenti yanında Gənclər Fondunun dəstəyi, "Azərbaycan Turizm İnstitutu Məzunları” İctimai Birliyi və Nərimanov Rayon Gənclər və İdman İdarəsinin birgə təşkilatçılığı ilə həyata keçirilən "İdman tariximizdə növbəti qızıl mərhələ” layihəsinin bağlanış mərasimi keçirilib.

Layihə çərçivəsində ölkəmizi Avropa və dünya çempionatlarında təmsil edən və fəxri kürsünün ən yüksək pillələrinə sahib olaraq bayrağımızı yüksəklərə qaldıran idmançılarımızla 5 ali təhsil müəssisəsində gənclərlə görüşü baş tutub.

Bağlanış mərasimində Nərimanov Rayon Gənclər və İdman İdarəsinin rəisi Nəcəf Novruzov, Kik-boks Federasiyasının vitse-prezidenti Güloğlan Cabbarov, Karate idman növü üzrə dəfələrlə Dünya və Avropa çempionu Rafael Ağayev, Jiu- Jitsu idman növü üzrə Dünya çempionu, "Qarabağ” idman klubunun rəhbəri Anar Səfərov, Kik-boks idman növü üzrə Peşəkarlar arasında Dünya Kəmərinin sahibi Ramal Aslanov, Uşu-Sanda idman növü üzrə Peşəkarlar arasında Dünya Kəmərinin sahibi Taleh İsayev, Universal idman növü üzrə Dünya və Avropa çempionu Nicat Əliyev və bir sıra media nümayəndələri iştirak edib.

Mərasimi "Azərbaycan Turizm İnstitutu Məzunları” İctimai Birliyinin sədri Ağamir Ağamirov giriş sözü ilə açaraq layihə haqqında məlumat verib, ölkəmizdə keçirilən beynəlxalq idman tədbirlərinin əhəmiyyətini vurğulayaraq 2017-ci ildə keçiriləcək İslam Həmrəylik Oyunları haqqında gənclərə geniş məlumat vermişdir sonda layihənin həyata keçirilməsində dəstəyi olan Azərbaycan Respublikasının Prezidenti yanında Gənclər Fondunun rəhbərliyinə və digər qurumlara öz minnətdarlığını bildirib.

Sonra Nərimanov Rayon Gənclər və İdman İdarəsinin rəisi Nəcəf Novruzov əsası ulu öndər Heydər Əliyev tərəfindən qoyulmuş, bu gün cənab prezident İlham Əliyev tərəfindən uğurla davam etdirilən gənclər və idman siyasəti haqqında çıxış edərək, bu gün ölkəmizdə idmanın inkişafı üçün yaradılan geniş imkanlardan danışıb.

Daha sonra Kik-boks Federasiyasının vitse-prezidenti Güloğlan Cabbarov, çıxış edərək Federasiyasının fəaliyyəti haqqında geniş məlumat vermiş və özünün idmanda əldə etdiyi təcrübəsini gənclərlə bölüşüb.

Çıxış edən Karate idman növü üzrə 5 qat Dünya, 13 dəfə Avropa çempionu olmuş Rafael Ağayev keçirdiyi döyüşlər zamanı yaranan bir sıra maraqlı anlardan və beynəlxalq imdan yarışlarında idmançılar üzərində qazandığı qələbədən danışaraq ölkəmizi təmsil etməkdən qürur duyduğunu bildirib.

Jiu- Jitsu idman növü üzrə Dünya çempionu, "Qarabağ” idman klubunun rəhbəri Anar Səfərov çıxış edərək bu kimi görüşlərin keçirilməsi ilə gənclərin idmana olan marağının daha da artacaqını qeyd edib, ölkəmizdə idmançılara göstərilən diqqət və qayğıya görə dövlətimizin başçısına öz minnətdarlığını bildirib.

Kik-boks idman növü üzrə Peşəkarlar arasında Dünya Kəmərinin sahibi Ramal Aslanov, Uşu-Sanda idman növü üzrə Peşəkarlar arasında Dünya Kəmərinin sahibi Taleh İsayev, Universal idman növü üzrə Dünya və Avropa çempionu Nicat Əliyev idmançılara yaradılan əlverişli şəraitdən söz açaraq, 2017-ci ildə keçiriləcəkİslam Həmrəylik Oyunlarına hazırlıq məşq prosesindən danışdılar, idmançılarımızın İslam Həmrəylik Oyunlarında yüksək nəticələr əldə edəcəklərindən gəncləri əmin etdilər.

Sonra idmançılar gəncləri maraqlandıran sualları cavablandırıblar.

Sonda bağlanış mərasimində iştirak edən idmançılar layihə çərçivəsində keçirilmiş seminarlarda yaxından əməkdaşlıq etdiyinə görə fəxri fərmanlarla təltif olunmuşlar.

Qeyd edək ki, layihənin məqsədi Azərbaycan idmanının tarixini idmançılarımızın əldə etdikləri uğurları əyani şəkildə göstərmək, gəncləri 2017 -ci ildə keçiriləcək İslam Həmrəylik Oyunlarında idmançılara dəstək olmalarına, Vətənimizi və bayrağımızı yüksəltməyə çağırmaq.Onlaraidmanın əhəmiyyət və vacibliyinin çatdırılması, sağlam həyat tərzinə dəvət edilməsi, ölkəmizdə idman və idmançılara yaradılan geniş imkanlardan gənclərin yararlanması, beynəlxalq idman tədbirlərində ölkəmizi layiqli təmsil etməyin şərəfli bir vəzifə olmasının və bunun həmin tədbirlərə ev sahibliyi edən ölkəmiz üçün önəminin aşılanmasıdır.