Qarabağa görə Avropadan diplomatik həmlə - Brüssel tələsir, Moskva isə...

AB rəsmisi Bakıya İrəvandan gələcək. Zalber ötən həftəsonu artıq İrəvanda Ermənistan prezidenti Serj Sərkisyanla bir araya gəlib. Sərkisyanın mətbuat xidmətindən verilən xəbərə görə, görüşdə əsasən Qarabağ problemi ətrafında fikir mübadiləsi aparılıb. "Prezident Sərkisyan Zalberi əmin edib ki, erməni tərəfi regionda sülh və təhlükəsizliyin bərqərar edilməsi naminə konstruktiv addımlara hazırdır. 

Ermənistan prezidenti həmçinin Qarabağ konfliktinin dinc nizamlanması məqsədi ilə AB-nin etimad atmosferi yaratmağa yönəlik səylərini yüksək qiymətləndirib”, - deyə Sərkisyanın mətbuat xidməti bildirib.

Qeyd edək ki, AB-nin xüsusi nümayəndəsi Ermənistanda vətəndaş cəmiyyəti nümayəndələri ilə, o cümlədən sərhədyanı rayonların sakinləri və Dağlıq Qarabağdakı separatçı rejimin təmsilçisi ilə də görüşüb. Bu da sözsüz ki, qurumun Qarabağ məsələsinə artan həssasiyyətindən xəbər verir.

*** 

Diplomatın ATƏT-in Minsk Qrupu həmsədrlərinin regiona səfəri ilə eyni vaxtda bölgəyə təşrif buyurması diqqət çəkməyə bilməz. O da diqqətçəkicidir ki, AB-nin rəsmi elçisi Qarabağdakı separatçı rejimin nümayəndəsi ilə - qondarma qurumun "xarici işlər naziri” Karen Mirzəyanla Xankəndində yox, İrəvanda görüşüb. Bu da Azərbaycanın suverenliyi və ərazi bütövlüyünə təşkilatın sayğı jesti sayıla bilər. 

İstisna deyil ki, Brüssel həmçinin Avroatlantik məkanın ən qaynar məntəqələrindən olan və AB ilə birbaşa sərhəddə yerləşən və son günlər daha da gərginləşən Ukrayna böhranın fonunda postsovet məkanında ikinci potensial müharibə ocağı - Dağlıq Qarabağ ətrafında durumu özü üçün dəqiqləşdirmək istəyir. Sülh və müharibə şanslarının nə dərəcədə ciddi olduğuna əmin olmaq niyyətindədir. Bunun ardınca Avropa Birliyi səviyyəsində Qarabağ mövzusunun təzədən gündəmə gələcəyini istisna etmək olmaz.  

***

Hər necə olmasa, Azərbaycan özünün bənzərsiz geosiyasi mövqeyi, energetik potensialı, multikultural özəlliyi ilə AB üçün Ermənistandan qat-qat böyük dəyər daşıyır. Söhbət xüsusən də ölkəmizin "köhnə qitə” üçün energetik əhəmiyyətindən, o sırada Avropanın qaz təchizatında Rusiya asılılığını azaltmaq üçün Azərbaycan qazını Avropa bazarlarına çatdıracaq yeni qaz kəmərlərindən, Cənub Qaz Dəhlizi layihəsindən (TANAP, TAP) gedir. Qarabağ münaqişəsinin qızışması isə gələn il işə düşməyə başlayacaq bu kəmərlərə ciddi təhlükə yaradardı. 

Bu yerdə yada salaq ki, az öncə ABŞ-ın nüfuzlu nəşrlərindən biri Kremlin postsovet məkanında 6 mümkün ssenarilərindən biri kimi Güney Qafqazdan keçib Avropaya ünvanlanan neft-qaz kəmərlərinə təhlükə yaratmaq planını qeyd etmişdi. Bu da məntiqlidir, çünki Moskva yaxşı fərqindədir ki, bölgə ölkələrini Avropa ilə, Avropa Birliyi ilə nə qədər çox iqtisadi-ticari tellər, neft-qaz kəmərləri bağlasa, bir o qədər onlar Rusiyanın asılılığından uzaqlaşmış olacaq. 

Kremlin potensial müharibə ocağı kimi Dağlıq Qarabağ ixtilafının həllinə xüsusi maraq göstərməməsinin bir səbəbi budur. Necə deyərlər, Brüssel tələssə də, Moskva əksinə - Qarabağ problemindən maksimum divident götürməyincə, vaxtı uzatmağa çalışır. Bakı isə əlbəttə ki, konfliktin həllinə real kömək edənlərin yanındadır.